पुणे : संग्रहालय बघण्याचेही एक तंत्र असते; पण सगळ्यांनाच ते माहीत नसते. त्यामुळे सर्वसामान्य लोकांसाठी संग्रहालय बघणे ही गोष्ट फारशी उत्कंठावर्धक नसते. संग्रहालय पाहण्याचा अनुभव रोचक करण्याच्या उद्देशाने आशुतोष पोतनीस आणि अश्विन चितळे यांनी संग्रहालयाच्या हेरिटेज वॉकची सुरुवात केली आहे.
पुण्यातील राजा केळकर संग्रहालयाच्या हेरिटेज वॉकपासून याची सुरुवात होणार आहे. येत्या रविवारी, चार ऑगस्ट रोजी संध्याकाळी चार वाजता या हेरिटेज वॉकची सुरुवात होणार आहे. यासाठी ऐच्छिक शुल्क असून, इच्छुकांनी ठरलेल्या वेळेत राजा केळकर संग्रहालयाजवळ जमायचे आहे.
पेशवेकालीन इतिहास आणि प्राचीन ऐतिहासिक वारशासाठी प्रसिद्ध असलेले हे संग्रहालय अनेकांनी अनेकदा पाहिले असेल; पण तेथील प्रत्येक गोष्टीचा इतिहास उलगडत ते पाहण्याचा अनुभव निश्चितच अनोखा ठरणार आहे. पुरातत्त्वशास्त्रातील पदव्युत्तर शिक्षण घेतलेले अश्विन चितळे गेल्या दोन- डीच वर्षांपासून ऐतिहासिक स्थळांच्या सहलींचे आयोजन करत आहेत, तर पेशवेकालीन इतिहासात रमणारे आशुतोष पोतनीस त्यांना सहकार्य करत आहेत. इतिहासाची आवड आणि अभ्यास असलेल्या या दोघांच्या मार्गदर्शनाखाली होणारा हा हेरिटेज वॉक संग्रहालय बघण्याची नवी दृष्टी देईल.
कार्यक्रमाविषयी : पुण्यातील राजा केळकर संग्रहालय हेरिटेज वॉक
दिवस व वेळ : रविवार, ४ ऑगस्ट, सायंकाळी चार वाजता.
नावनोंदणीसाठी संपर्क :
आशुतोष पोतनीस : ९८२२० ४९१०५
अश्विन चितळे : ८९७५९ ०९७२७